ہرارے (ڈیلی پاکستان آن لائن) پاکستان اور آسٹریلیا کے مابین ٹرائینگولر سیریز کے ٹی ٹوئنٹی میچ میں آسٹریلیا نے گرین شرٹس کو 9 وکٹوں سے شکست دے دی ۔
تفصیلات کے مطابق 117 رنز کے ہدف کے تعاقب میں آسٹریلیا نےدھواں دھار بیٹنگ کی اور 10 اعشاریہ 5 اوورز میں ہدف باآسانی ایک وکٹ کے نقصان پر عبور کرلیا۔ آسٹریلیا کی جانب سے ڈی آر سی شاٹ وہ واحد کھلاڑی ہیں جنہوں نے میچ کے دوران اپنی وکٹ گنوائی ۔ انہوں نے 15 رنز بنائے اور حسن علی کی گیند پر حسین طلعت کے ہاتھوں کیچ آؤٹ ہوئے۔علاوہ ازیں ایرون فنچ نے دھواں دھار اننگز کھیلی اور 33 گیندوں پر 6 چھکوں اور 4 چوکوں کی مدد سے 68 رنز بنائے۔اننگز کا اختتام بھی انہوں نے چوکا لگا کر کیا۔ آسٹریلیا کی جانب سے ٹراوس ہیڈ نے 20 رنز بنائے۔

